20 April 2024
ഏവര്‍ക്കും സ്വീകാര്യമായ സുഗന്ധമുള്ളതും ജ്വലനസ്വഭാവവുമുള്ളതുമായ വസ്തുവാണ് കര്‍പ്പൂരം.
ഈശ്വരാരാധനാ വേളകളില്‍ ഉപയോഗിക്കുന്ന പൂജാദ്രവ്യങ്ങളില്‍ പ്രധാനികൂടിയാണ് കര്‍പ്പൂരം.
ദൈവാരാധനയുടെ അവസാനം കര്‍പ്പൂരം കത്തിച്ച് ആരതി ഉഴിയുന്നതും ആ കര്‍പ്പൂര ദീപത്തെ ഇരുകൈകളാല്‍ വണങ്ങുന്നതും ആചാര അനുഷ്ഠാനങ്ങളുടെ ഭാഗമാണ്.
ഇങ്ങനെ ചെയ്യുന്നതിനു പിന്നിലുള്ള തത്വവും മഹത്വവും വളരെ വലുതാണെന്ന് ആചാര്യന്‍മാര്‍ പറയുന്നു.
കത്തിയ ശേഷം ഒന്നും അവശേഷിപ്പിക്കാത്ത വസ്തുവാണ് കര്‍പ്പൂരം. അതുപോലെ മനുഷ്യരുടെ ഉള്ളിലുള്ള അഹന്തയെ ഇല്ലാതാക്കുന്നതിന്റെ പ്രതീകമായാണ് കര്‍പ്പൂരം കത്തിക്കുന്നതെന്ന് വിശ്വാസം.
സന്ധ്യാനേരങ്ങളില്‍ വീടുകളില്‍ നിലവിളക്ക് തെളിയിച്ച ശേഷം കര്‍പ്പൂര ദീപം ഉഴിയുന്നത് അത്യുത്തമമെന്ന് ആചാര്യമതം.
കര്‍പ്പൂര ദീപം തൊട്ടു വണങ്ങുമ്പോള്‍ മനസ്സിലെ മാലിന്യങ്ങള്‍ നീങ്ങുന്നതിനോടൊപ്പം ശരീരശുദ്ധിയും കൈവരുമെന്ന് വിശ്വസിച്ചു പോരുന്നു.
കര്‍പ്പൂരം കത്തുമ്പോളുള്ള സുഗന്ധം വീടിനുള്ളിലെ അന്തരീക്ഷവായുവിനെ ശുദ്ധീകരിക്കുകയും മനുഷ്യ ശരീരത്തില്‍ അനുകൂല ഊര്‍ജം നിറയ്ക്കുകയും ചെയ്യും. ശുഭ ചിന്തകള്‍ വളരുവാന്‍ ഈ ഊര്‍ജ്ജം സഹായകരമായേക്കും.